Соболооххо кыстыкка киирии иннигэр субуотунньуктаатылар

Ааспыт нэдиэлэҕэ Муома Соболооҕор кыстыкка киириигэ бэлэмнэнии үлэтэ, субуотунньуктар буолан аастылар. Кыстык хаар түһүөн иннинэ, нэһилиэккэ аһыы оту хомуйууга күргүөмнээхтик үлэлээтилэр. 


Соболоох олохтоохторо хастыы да киһилээх бөлөхтөргө арахсан, дьааттаах оту балачча куулу хомуйдулар. Кэрэхсэбиллээҕэ, субуотунньукка сүөһүтэ суох дьон эмиэ кыттыстылар. Бу ордук сиэҥҥэ үүнэр от. Кини ынах сүөһүгэ эрэ буолбакка, тыа кыылларыгар эмиэ кутталы үөскэтэр. Манна нэһилиэк дьоно тахсан, бу оту барытын да буолбатар, хомуйа сатаатылар.

Соболоох-Хонуу икки ардыгар сырыы тохтоон турар. Нэһилиэк кыһыҥҥы суол туруор диэри сүрүн аһынан хааччыллыылаах.

Оттон коммунальнай хаһаайыстыбаҕа эрдэттэн былааҥҥа турбут трасса өрөмүөнэ оҥоһулунна. Билигин улахан тымныылар түһэ илик буоланнар, хочуолунай биир оһоҕо оттуллар.

Олохтоох оскуола дириэктэрэ Р.Е. Старкова кэпсээбитинэн, оскуола кыстыкка бэлэм. 9, 11 кылаастарга ОГЭ-ҥэ, БКЭ-ҥэ бэрэбиэркэлиир тестирование буолла, үлэ саҥа төлөбүрүн тиһигэ киирдэ.

«Оскуолабытыгар кырдьаҕастар күннэрин бэлиэтээтибит, эбэлэри кытары кылаас чаастара буоллулар. Дьахтар кэмитиэтэ, бэтэрээннэр холбоһоннор, сылаас чэйдээх остуол тэрилиннэ. Учуутал күнүгэр «Мэҥэ арыыта» диэн сиргэ айылҕаҕа тахса сырыттыбыт. Оҕолор бэйэни салайыныы күнүн бэрт эппиэтинэстээхтик ыыттылар. Оскуолабыт үлэтин-хамнаһын социальнай ситимнэр нөҥүө сырдатабыт», – диэн кэпсээтэ Раиса Егоровна.

Ааптар: Николай КОРЯКИН

Сообщение Соболооххо кыстыкка киирии иннигэр субуотунньуктаатылар появились сначала на Ulus.Media — все главные новости из районов Якутии.

Комментарии закрыты.