Суолга сэрэхтээх буолууну хас биирдии оҕо кыра эрдэхтэн билэрэ олох ирдэбилэ

Тыа сиригэр кэлиҥҥи кэмҥэ тиэхиниькэ арааһа киин сирдэртэн хаалсыбаттыы биллэ элбээтэ. Ону тэҥэ оҕолор кыра саастарыттан тиэхиньикэҕэ сыстан, бэл алын кылаастан матасыыкыл, скутер, массыынаны да ыыта үөрэнэллэрэ баар суол. Ол эрэн, тиэхиньикэни баһылыыры тэҥэ суол быраабылатын оҕо булгуччу билиэхтээх, ону тутуһуохтаах. Хас биирдии киһи олоҕо уйгулаах буоларын туһугар сокуону тутуһан бэрээдэктээхтик олоруохтаах. Ханнык баҕар буруй сокуонунан накаастанылларын оҕо эмиэ кыра сааһыттан билэ үөрэниэхтээх.

Онтон сиэттэрэн, Р.И.Шадрин аатынан Саккырыыр орто оскуолатыгар СӨ Ис дьыала министиэристибэтин «Верхоянскай» отделын ГИБДД старшай судаарыстыбаннай инспиэктэрэ Сергей Мурунов уонна полиция болномуочуйалаах учаскыабайа Нюргун Титов алын уонна улахан кылаас оҕолоругар интэриэһинэй бэсиэдэлэри аахтылар, ыйытыыларга хоруйдаатылар.

Суол инспиэктэрэ оскуола оҕолоругар икки көлүөһэлээх тиэхиньикэҕэ сэрэхтээх буолуу быраабылаларын кэпсээбитин бэлисипиэттээх кырачааннар бэрткэ сэргии иһиттилэр. Полиция учаскыабайа Нюргун Сарыалович бэрээдэк туохха олоҕуруохтааҕый, сокуон иннигэр эппиэтинэс туһунан бэсиэдэтин улахан кылаас үөрэнээччилэрэ интэриэһиргээтилэр.

2019 сыл саҕаланыаҕыттан Саха сиригэр 15 эчэйиини, 16 оһоллонуу, 3 сааһын ситэ илик оҕолор суолга эчэйиини ылбыттарын истэн харааһыннылар.

 

Нюргун Боярский, хаһыат «Бытантай уоттара»

Добавить комментарий

Ваш адрес email не будет опубликован. Обязательные поля помечены *