Сыл бастыҥ спортсменнара куоластааһынынан быһаарыллыахтара

Саха Республикатын физическэй култуураҕа уонна спорка министиэристибэтэ, сыл бастыҥ спортсменнарын быһаарыыны быйыл олох атыннык, саҥалыы, аныгылыы ыытарга соруктанар. Ол курдук, уруккулуу “Триуфмка” мунньан, эрдэттэн биллибит бастыҥнары чиэстиир-бочуоттуур эбит буоллаҕына, быйыл чулуулары куоластааһынан таларга быһаарда. Ол быһыытынан, спорт олимпийскай, олимпийскайа суох, адаптивнай уонна национальнай көрүҥнэригэр үстүү киһиттэн бастыҥнар куоластааһынынан талыллыахтаахтар.

Спорду таптааччылар бастыҥнары бэйэлэрэ таланнар, 4647 нүөмэрдээх телефоҥҥа СМС ыыталлар. Биир СМС сыаната – 6 солк. 20 харчы. Биһиэхэ, СР физическэй култуураҕа уонна спорка миниистирин солбуйааччы Александр Бугаев иһитиннэрбитинэн, куоластааһын бүтэһик быһаарыылаах күнүгэр – ахсынньы 21 күнүгэр субуотаҕа киэһээ 19:00 чаастан 21:00 чааска диэри “Саха” национальнай иһитиннэрэр-көрдөрөр хампаанньа быһа биэриитигэр бастыҥнар ааттаныахтара. Санатан эттэххэ, куоластааһын бүгүҥҥүттэн саҕаланна.

Түөрт бөлөххө куоластаныахтаах спортсменнар биллэллэр. Кинилэри Спорт министиэристибэтин анал аптарытыаттаах хамыыһыйата, спортивнай принцибинэн, ол аата, быйылгы сылга спорка ситиһиилэринэн көрөн быһаарда.

Олимпийскай көрүҥнэргэ:

— Владимир Егоров (көҥүл тустуу), куоластыыр кода 1

— Нюргуяна Никифорова (дзюдо), куоластыыр кода 2

— Сардаана Трофимова (чэпчэки атлетика), куоластыыр кода 3
Олимпийскайа суох көрүҥнэргэ: 

— Николай Гуляев (дуобат), куоластыыр кода 11

— Айаал Макаров (компакт-спортинг), куоластыыр кода 12
— Матрена Ноговицына (дуобат), куоластыыр кода 13

Адаптивнай спорт көрүҥнэригэр:

— Степанида Артахинова (оҕунан ытыы), куоластыыр кода 21

— Владимир Балынец (пауэрлифтинг), куоластыыр кода 22
— Сергей Николаев (көҥүл тустуу), куоластыыр кода 23

Национальнай көрүҥнэргэ:

— Николай Иванов (хапсаҕай), куоластыыр кода 31
— Сергей Константинов (мас-рестлинг), куоластыыр кода 32
— Алексей Сазонов (хотугу многоборье), куоластыыр кода 33.

Бастыҥнары талыы бастакы саҕалааһыныгар киһи кэрэхсиирэ диэн, республика олохтоохторо бары кыттыахтарын сөп, ол аата, норуот бэйэтэ талар. Маннык, бастакы холонуу хайдах барарын көрүөхпүт уонна сыаналыахпыт.

Оттон 2019 сыл үөрэнээччилэргэ бастыҥ спортсменнарын, үгэс быһыытынан сыл аайы ыытыллар “СР Ил Дарханын Саҥа дьыллааҕы харыйатын” тэрээһинигэр чиэстиэхтэрэ. Ити курдук, ахсынньы 20 күнүгэр СР физическэй култуураҕа уонна спорка министиэристибэтин сылы түмүктүүр коллегиятын кэмигэр, номинациялырынан бастыҥнар быһаарыллыахтара. Коллегия СР Бырабыыталыстыбатын 2 нүөмэрдээх дьиэтигэр ыытыллара былааннанар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *