Тааттаҕа Саха сирин суруйааччылара ыалдьыттаатылар

Бу күннэргэ Таатта улууһугар ыытылла турар “Дьүөрэлэһии көдьүүһэ: искусство + уһуйуу” үөрэхтээһин уонна культура үлэһиттэрин холбоһуктаах форумун чэрчитинэн үгүс тэрээһин бара турар. Олортон биирдэстэринэн Саха сирин суруйааччыларын улахан бөлөҕө кэлэн барыыта буолла.


Бөлөҕү Саха сирин Суруйааччыларын сойууһун бырабылыанньатын бэрэссэдээтэлэ, Саха народнай поэта Н.И.Харлампьева салайан илдьэ кэллэ. Бөлөх састаабыгар бырабылыанньа бэрэссэдээтэлин солбуйааччылар Г.Г.Андросов, С.Е.Сивцев, народнай суруйааччы С.А.Попов-Тумат, биир дойдулаахпыт Н.Е.Винокуров-Урсун, «Чолбон» сурунаал редактора Д.Н.Макеев уонна тылбаасчыт А.А.Борисова бааллар. Ону сэргэ биһиги улууспутугар олорор сойуус чилиэнэ А.И.Слепцов кыттыыны ылла.


Суруйааччылар улуус дьаһалтатын актовай саалатыгар учууталлары, библиотека, культура үлэһиттэрин, литератураны интэриэһиргиир дьону кытта көрүстүлэр. Көрсүһүүнү улуус баһылыгын солбуйааччы И.А.Сивцева сүрүннээтэ. Кини бу көрсүһүү Саха сирин Суруйааччыларын сойууһа тэриллибитэ 85 сылынан биһиги улууспутугар ыытыллара улахан суолталааҕын, ол курдук Таатта бастакы суруйааччылара саха литературата сайдан-үүнэн тахсарыгар сүрүн олугу уурбуттарын, саха литературата аан дойду литературатыттан, олоҥхотуттан тирэх ылан сайдыбытын, кинилэр тэлбит суолларын салҕаан билигин Саха сирин Суруйааччыларын сойууһа Россияҕа, Россия таһыгар тиийэ биллэр-көстөр үлэни ыытарын бэлиэтээтэ уонна быйылгы үбүлүөйдээх сылынан улуус дьаһалтатын, Суруйааччылар сойуустарын икки ардыларыгар бииргэ үлэлээһин дуогабара түһэрсиллэр буолбутун туһунан үөрүүлээх сонуну иһитиннэрдэ, Түмүгэр үөрүүлээх быһыы-майгы ортотугар суруйааччылар сойуустарыгар улуус дьаһалтатын Махтал суругун, Н.И.Харлампьеваҕа «Таатта улууһун сайдыытыгар кылаатын иһин» 1-кы, Г.Г.Андросовка III-с степеннээх бэлиэлэри туттарда.


Саха сирин Суруйааччыларын сойууһун бырабылыанньатын бэрэссэдээтэлэ Н.И.Харлампьева суруйааччылар бу кэлиилэрэ сойуус тэриллибитэ 85 сыллаах үбүлүөйүгэр ананарын, сойуус бастакы бэрэссдээтэлэ П.А.Ойуунускай Таатта киһитэ буоларынан үбүлүөйдээх көрсүһүүнү Тааттаттан саҕалаабыттарын, суруйааччылар сойуустара олус уустук кэми, элбэх мөккүөрү ааһан баччаҕа кэлбитин, ол мөккүөр 1962 сылга диэри салҕанан барбытын, ити сыл тахсыбыт партия обкомун уурааҕа мөккүөрү төрдүттэн быһаарбатаҕын, ол саҕана суруйааччылар, учуонайдар ортолоругар утарыта турсуу баарын, онтон Семен, Софрон Даниловтар сойууһу салайан олорор кэмнэригэр саха литературатын киэҥ эйгэҕэ, саҥа таһымҥа таһаарарга күүстээх үлэни ыыппыттарын бэлиэтээтэ.

Кэлин кэмҥэ саха литературата күүскэ сайдан эрэрин, ол курдук Е.В.Слепцова-Куорсуннаах «Сааскы кэм» ромаҥҥа тэҥнээх сүдү айымньыны суруйбутун, В.В.Харысхал саха бастакы интеллигенциятын эрэйин-муҥун көрдөрөр 9 испэктээкили суруйан, Саха театрыгар туруортарбытын, С.А.Попов-Тумат хоту дойду дьонун олоҕун-дьаһаҕын туһунан киэҥник сырдатарын, саха суругун-бичигин төрүттээбит С.А.Новгородов туһунан элбэҕи суруйбутун, саха литературатыгар эдэрдэр тоҕо анньан киирбиттэрин туһунан эттэ.
Ити кэнниттэн суруйааччылар сойуустарын өттүттэн Н.И.Харлампьева уонна улуус дьаһалтатын өттүттэн И.А.Сивцева хардарыта бииргэ үлэлээһин дуогабарыгар илии баттаатылар.


Итинтэн салгыы ыалдьыттарбыт Н.Е.Винокуров-Урсун, П.Н.Харитонов-Ойуку, С.А.Попов-Тумат, А.А.Борисова, С.Е.Сивцев, Д.Н.Макеев, Г.Г.Андросов литература, төрөөбүт тыл сайдыытын, үөрэх-иитии үлэтин боппуруостарын таарыйан, санаа атастаһан тыл эттилэр, бэйэлэрэ ыытар үлэлэрин-хамнастарын билиһиннэрдилэр, хоһооннорун ааҕан иһитиннэрдилэр.

Тылбаасчыт А.А.Борисова биһиги улууспут биир элбэҕи эрэннэрэр поэта, Өксөкүлээх Өлөксөй сиэнэ, Р.А.Кулаковскай уола А.Р.Кулаковскай-Дьэҥкир суруйбут «Хомус» диэн хоһоонун нууччалыы тылбааһын ааҕан иһитиннэрбитин мустубут дьон ытыс тыаһынан көрүстүлэр.
Кинилэр кэннилэриттэн национальнай оскуолалар институттарын үлэһитэ, педагогика наукатын кандидата Е.П.Чехордуна, улуустааҕы культура управлениетын начальнигын солбуйааччы М.В.Степанова, кыраайы үөрэтэр музей директора М.А.Попова, «Таатта» хаһыат редактор-директора А.К.Посельская төрөөбүт тыл, саха литературатын сайдыытын боппуруостарын таарыйан тыл эттилэр.


Көрсүһүү кэмигэр Н.И.Харлампьева суруйааччылар сойуустарын аатыттан «Хадаайы» музейыгар уонна улуустааҕы киин библиотекаҕа саха суруйаачыларын кинигэлэрин бэлэхтээтэ. Онтон салгыы суруйааччылар «Таатта» литературнай-художественнай музейга тиийэн, саҥа оҥоһуллан эрэр «Суруйааччылар аллеяларыгар» мас олордуутун сиэригэр-туомугар кытыннылар.

Ааптар: Н.ИОВЛЕВ.

Сообщение Тааттаҕа Саха сирин суруйааччылара ыалдьыттаатылар появились сначала на Ulus.Media — все главные новости из районов Якутии.

Комментарии закрыты.