Токио-2020: Тустууга олимпийскай путевканы кимнээх ылыахтарай?

Олимпиадабыт короновируһынан сибээстээн ыытыллара дуу, ыытыллыбата дуу, эбэтэр ыытыллар буоллаҕына хайдах буолара чуолкайа өссө биллибэккэ турар эрээри, быйылгы сыл аан дойду үрдүнэн саамай улахан таһымнаах тэрээһинин туһунан умнумуоххайыҥ. Бу суруйууга, биһиги бэйэбит бөҕөстөрбүт кыттар, көҥүл тустууга 57 киилэҕэ олимпийскай путевканы былдьаһыы балаһыанньатын ырытан көрүөххэ.      

 

Былырыын Нур-Султаҥҥа (Казахстан) аан дойду чемпионатыгар олимпийскай ыйааһыннарга биэс күүстээхтэр ахсааннарыгар киирбит алта бөҕөс бэйэтин дойдутугар Токиотааҕы Олимпиадаҕа кыттар быраабы аҕалбыта. Ол курдук, 57 киилэҕэ Завур Угуев (Россия) чемпионнаабыта, Сулейман Атли (Турция) иккис, Нурислам Санаев (Казахстан) уонна Рави Кумар (Индия) үһүс, Стеван Мичич (Сербия) уонна Реза Атри (Иран) бэһис миэстэлэри ылбыттара.

Өссө төгүл санатан эттэххэ, көҥүл тустууга олимпийскай путевка чопчу спортсмеҥҥа бэриллибэт гынан баран, тус санаабар уонна билиҥҥи туругунан, Олимпиадаҕа чуо ити ааттаммыт бөҕөстөр кыттыахтара дии саныыбын. Тоҕо диэтэххэ, кинилэр бэйэлэрин дойдуларын утарсааччыларынааҕар күүстээхтэр.

Балаһыанньа быһыытынан, Токиоҕа хас ыйааһын ахсын 16-лыы бөҕөс кыттыахтаах. Ол курдук, Америка, Европа, Азия, Африка уонна Океания континеннарыттан уонна бүтэһик, аан дойдутааҕы квалификационнай турниртан иккилии бастыҥ көрдөрүүлээх бөҕөстөр талыллыахтаахтар. Ол эрээри, аан дойду үрдүнэн коронавирус ыарыы тэнийэн, билиҥҥитэ Америкаттан ураты континеннарга Олимпийскай оонньууларга сүүмэрдиир күрэхтэһиилэр ыытыллыахтаах болдьохторугар ыытыллыбакка – көһөрүлүннүлэр.

Америка континенын күрэхтэһиитэ Канада Оттава куоратыгар буолла. Онуоха 57 кг ыйааһыҥҥа американец Томас Гилман уонна Оскар Тигрерос (Колумбия) баҕалаах көрдөрүүлэрин ситистилэр. Тигрерос Токиоҕа тиийиэн сөп, оттон Гилман өссө дойду иһинээҕи сүүмэрдээһиҥҥэ бэйэтин көрдөрүөн наада. Онон билиҥҥи туругунан аҕыс дойду бөҕөстөрө олимпийскай путевканы ыллылар, аны биир итиччэ путевка оонньонуохтаах.

Ол путевка иһин киирсии сытыы уонна тыҥааһыннаах буолар чинчилээх. Тоҕо диэтэргит, билигин даҕаны ааттаах-суоллаах, олимпиец аатын ылыан сөптөөх бөҕөстөр аҕыйаҕа суохтар. Холобур, Рейнери Ортега (Куба), Бехбаяр Эрдэнэбат (Монголия), Рей Хигучи (Япония), Махир Амирасланов (Азербайджан), Арсен Арутюнян (Армения), Ким Сунг Кам (КНДР), Андрей Яценко (Украина), Улугбек Жолдожбеков (Кыргызстан), Владислав Андреев (Беларусь), Хорст Лехр (Германия) уо.д.а.

Бу ааттаммыт бөҕөстөр сүрүннээн алта эрэ путевка иһин тустуохтара: Азия, Европа уонна аан дойдутааҕы турнирдарга. Тоҕо диэргит, өссө икки путевка Африка уонна Океания күрэхтэһиитин кыттыылаахтарыгар бэриллиэҕэ. Дьол дьэ кимиэхэ тосхойор?

57 кг бу күҥҥэ олимпийскай путевкалаах хамаандалар: Россия, Турция, Индия, Казахстан, Сербия, Иран, АХШ, Колумбия.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *