Турнир кэмигэр Д.П. Коркиҥҥа сыһыаннаах быыстапка көрдөрүүгэ туруорулунна

Билэргит курдук, балаҕан ыйын 9-17 күннэригэр “Строительнай” Атыы эргиэн комплексын Быыстапкалыыр саалатыгар СР культуратын үтүөлээх үлэһитэ Татьяна Афанасьевна Гоголева көҕүлээһининэн, “Коркинныы олоруохха! Коркинныы айыахха!” диэн республикатааҕы быыстапка иккис сылын үлэлээбитэ. Бу тэрээһин дьон-сэргэ биһирэбилин ылан, сорох экспонаттара аны Спорка бэлэмнэнии республикатааҕы киин салалтатын (дириэктэр Л.Н. Спиридонов) көрдөһүүтүнэн биһиги улуу тренербит Дмитрий Петрович Коркин кэриэһигэр көҥүл тустууга норуоттар икки ардыларынааҕы турнир кэмигэр “Триумфка” көрдөрүүгэ туруоруллан, тустууну таптааччылар сэҥээриилэрин ылла.

 

Ол курдук, турнир кэмигэр тэриллибит быыстапкаҕа Чурапчытааҕы Спорка Албан аат музейын (дириэктэр Е.В. Пудов), олимпийскай чемпион Павел Пинигин, Р.М. Дмитриев аатынан Олимпийскай эрэл училищетын (дириэктэр А.А. Филиппов), Саха АССР үтүөлээх тренерэ Константин Сергеевич Постников көһө сылдьар быыстапкалара “Строительнайга” туруоруллубут эбит буоллахтарына, Е.Ярославскай аатынан кыраайы үөрэтэр республикатааҕы музей Дмитрий Петрович Коркиҥҥа сыһыаннаах сэдэх экспонаттарын аан бастаан маннык, көһө сылдьар быыстапкаҕа көрдөрүүгэ туруорда.

Музей эппиэттээх үлэһитэ Евстафий Прибылых иһитиннэрбитинэн, дьон ордук Дмитрий Петрович кэтэ сылдьыбыт спортивнай көстүүмүн, тус докумуоннарын, наҕараадаларын уонна тутта сылдьыбыт малларын сэҥээрэн көрбүттэр. Өссө сорохтор ити экспонаттары көрөн, уруккуларын санаан, тренердэрин-учууталларын Бөтүрүөбүһү ахтан-санаан ылбыттара наһаа истиҥ көстүү дии саныыбын.

Ити курдук, ытыктыыр киһибит Д.П. Коркин аатынан турнир аҥаардас күрэхтэһии эрэ быһыытынан буолбакка – история, культура өттүнэн эмиэ быктарыллан көрдөрүллүбүтэ кэрэхсэбиллээх. Аны, эһиил кулун тутар ыйга бастакы олимпийскай чемпиоммут Роман Дмитриев кэриэһигэр эдэрдэргэ норуоттар икки ардыларынааҕы турнир тэриллиэ. Онно эмиэ, чуо Роман Михайловичка эрэ сыһыаннаан анал быыстапка турарыгар баҕарабын.

Петр ПАВЛОВ.

Ааптар хаартыскаҕа түһэриилэрэ.  

 

Добавить комментарий

Ваш адрес email не будет опубликован. Обязательные поля помечены *