УЧУУТАЛ БЭЙИЭТ ҮБҮЛҮӨЙЭ

Бу дьыл алтынньы 3 күнүгэр мэҥэлэр Россия Суруйааччыларын сойууһун чилиэнэ, оҕо литературатыгар Саха Өрөспүүбүлүкэтин Ил Дарханын Н.Е.Мординов-Амма Аччыгыйа аатынан бириэмийэтин 2018 сыллааҕы лауреата, СӨ үөрэҕириитин туйгуна, Учууталлар учууталлара, оҕо аймах тапталлаах суруйааччыта Константин Сосин 75 сааһын бэлиэтиир үбүлүөйдээх тэрээһини  ыыттылар.

Майаҕа «Кыталык» сынньалаҥ киинигэр «Доҕоруом – поэзия, сэргэ хаамсан иһэрбит саныахха үчүгэйин!» литературнай биэчэргэ Мэҥэ улууһун баһылыгын социальнай боппуруостарга солбуйааччыта Н.Г. Цыпандин, Дьокуускайтан кэлбит ыалдьыт суруйааччылар: П.А. Ойуунускай аатынан литературнай музей сүрүн үлэһитэ Н.Е. Винокуров-Урсун, «Чолбон» сурунаал редактора И.И. Осипов-Уйбаан Ойуур, «Күрүлгэн» литературнай альманах сүрүн редактора А.Г. Гуринов-Арчылан, драматург, киносценарист С.Н. Ермолаев-Сиэн Өкөр уонна «Чуораанчык», «Колокольчик» сурунааллар сүрүн редактордара Т.И. Жиркова, Тыыллыма орто оскуолатын коллектива, «Таммахтар» литературнай холбоһук бөлөҕүн чилиэннэрэ уо.д.а. Константин Сосин оҕолорго, ордук кырачааннарга поэзията сырдык, ыраас, эйэҕэс буоларын, оҕолору күүскэ таптыырын туһунан истиҥ, үтүө тыллары эттилэр, тыыннаах сибэкки дьөрбөтүн, өйдөбүнньүк бэлэх-туһах биэрдилэр. Манна бэйиэт хоһоонноро дорҕоонноохтук ааҕылыннылар, ону сэргэ ырыа бастыҥа ылланна, үҥкүү үчүгэйэ үҥкүүлэннэ уонна тиһэх уһугар мустубут дьоннор үбүлүөйдээх суруйааччыны кытта күргүөмүнэн хаартыскаҕа түстүлэр.

Эбиэттэн киэһэ Майатааҕы Иннокентий Сосин аатынан киин библиотека үлэһиттэрин уонна «Таммахтар» литературнай холбоһук чилиэннэрин көҕүлээһининэн, «Дьол түһүлгэтэ» диэн К.И. Сосин сырдык олоҕун сырдатар, аатырбыт айымньыларын ырытыһар сыаллаах астаах остуолу тэрийдилэр. Сандалы тула олорон сэһэргэһиигэ суруйааччы үбүлүөйүнэн тэрилтэлэр, общественность, биир кэмҥэ алтыһан ааспыт үөлээннээхтэрэ, айар идэлээхтэрэ, биир дойдулаахтара, аймах-билэ дьоно көхтөөхтүк кытыннылар. Кинилэр бэйиэти үбүлүөйүнэн эҕэрдэлээтилэр уонна тэппит атаҕын ыһыктыбакка айа-тута сылдьарыгар баҕардылар.

 

Иван ОСИПОВ-ОЙУУР

Ааптар хаартыскаҕа түһэриилэрэ

 

 

 

Добавить комментарий

Ваш адрес email не будет опубликован. Обязательные поля помечены *