Уус Алдан уола аллараа бэстээхтэргэ Кыайыы күнүнэн дьоһун бэлэҕэ

Мэҥэ Хаҥалас улууһун Аллараа Бэстээх бөһүөлэгэр олохтоох уолаттар Уус Алдантан төрүттээх Иннокентий Колесов уонна Балыктаах ыччата Семен Кычкин бэйэлэрэ тутан-хабан “Т-34-85” тааҥканы оҥордулар. Тааҥка сахаттан бастакынан Сэбиэскэй Сойуус Дьоруойа буолбут Ф.К.Попов уонна Улуу Кыайыыны уһансыбыт сэрии кыттыылаахтарын сырдык ааттарыгар ананан өйдөбүл уонна дириҥ махтал бэлиэтэ буолан, Кыайыы болуоссатыгар туруорулунна.


Оттон И.В.Колесов Бороҕон олохтоохторо, педагогическай үлэ бэтэрээннэрэ Анна Николаевна уонна Владимир Иннокентьевич Колесовтар кыра уоллара. Кини 1993 сыллаахха Мүрү орто оскуолатын үөрэнэн бүтэрбитэ. Инженер-механик идэлээх. Билигин бэйэтэ анал биригээдэ тэринэн тутууга үлэлиир.

Иннокентий Владимирович тимиргэ, маска сыстаҕаһа эһэтиттэн бэриллибит буолуон сөп. Эһэтин Орто Халыма оройуонун Сыбаатай бөһүөлэгин олохтооҕо Иннокентий Петрович Колесовы дэгиттэр талааннааҕын иһин колхуос салалтата куоракка тимиринэн уһаныы кууруһугар үөрэттэрэ ыыппыттар. Айылҕаттан талааннаах уус киһи колхуос, кэлин сопхуос тиэ­хиньикэтин өрөмүөнүн эт илии­тинэн, мындыр өйүнэн күөрт уотугар чочу­йан оҥорор эбит. Иннокентий Петрович 1944 с. «Үлэҕэ килбиэнин иһин» мэтээлинэн наҕараадаламмыт. И.В.Колесов ийэтинэн эһэтин Николай Михайлович Крыловы улуус аҕа саастаах дьоно бэркэ өйдүүр, убаастыыр киһилэрэ. Иннокентий Владимирович кэргэнинээн Саргылаана Григорьевналыын 5 оҕолоохтор, икки сиэннээхтэр.

Аҕа көлүөнэ албан ааттаах бойобуой суолун үйэти­тиигэ бэйэтин дьоһун кылаатын киллэрсибит биир дойдулаахпытынан киэн туттабыт.

Ааптар: Е.СЫРОВАТСКАЯ.

 

Комментарии закрыты.