Валерий Керемясов аатынан оскуолаҕа Тустуу күнэ

В.П. Керемясов аатынан Дьокуускай куорат 3 №-дээх спортивнай оскуолатыгар Тустуу күнэ буолан ааста. Тэрээһин – Саха Республикатын үөрэҕириитин туйгуна, СР култууратын уонна духуобунаһын туйгуна, тренер Петр Черкашин – Тэрчи алгыһынан саҕаланна.

 

 

 

Петр Петрович көбүөр кытыытыгар Аал уотун оттон, эдэр тустууктары саҥа кыайыыларга ыҥыран, үчүгэй үөрэҕи баҕаран алҕаабытын – оҕолор төгүрүччү олорон болҕойон иһиттилэр. Манна сыһыары тутан эттэххэ, бу эмиэ, эдэр ыччаты, оҕолору саха тыыныгар, омук быһыытынан үгэспитигэр иитии-такайыы биир көрүҥэ буоларын умнуо суохтаахпыт. Биир тылынан, бу оскуола салалтата маннык тэрээһиннэргэ Алгыс, Хомус, Оһуохай курдук сахалыы тыыны үөскэтэр дьаһаллары куруук ыытара кэрэхсэбиллээх.

Спортивнай оскуоланы өр сылларга ситиһиилээхтик салайан, дириэктэрдээн кэлбит, аҕыйах хонуктааҕыта “Российскай Федерация физическэй култуураҕа үтүөлээх үлэһитэ” бочуоттаах бэлиэнэн наҕараадаламмыт көҥүл тустууга бэтэрээннэргэ аан дойду чемпиона Федот Архипович Соловьев, быйылгыттан ыла оскуола иһинэн Тустуу күнэ тэриллэрин биллэрдэ. Буолан ааспыт “Боотурдар оонньуулара” тустуу бэстибээлигэр саастарынан араарыллыбыт түөрт бөлөххө барыта 936 эдэр тустуук кыттыбытын, онно В.П. Керемясов аатынан Дьокуускай куорат 3 №-дээх спортивнай оскуолатын иитиллээччилэрэ 40 мэтээли, ол иһигэр 14 кыһыл көмүһү ылбыттарын астына билиһиннэрдэ.

Быйылгы Тустуу күнэ, “Боотурдар оонньууларын” кыайыылаахтарын уонна иккис-үһүс миэстэлээхтэрин чиэстээһин быһыытынан тэрилиннэ. Маныаха анаан, анал өйдөбүнньүк бириистэри оҥотторон, ситиһиилээхтик кыттыбыт эдэр тустууктарга үөрүүлээх быһыыга-майгыга туттардылар. Ол бириистэри саха биллиилээх тустууга, Россия чемпиона, ССРС хамаанданан күрэхтэһиитин кыайыылаҕа, СР Спорка, Ыччакка, Туризмҥа миниистиринэн үлэлии сылдьыбыт спорт маастара Петр Егорович Попов, Хатастан сылдьар фермер, бэйэтин баҕатынан бу оскуола тренердэригэр анаан сыллата убаһа этинэн бириис туруорар Петр Васильевич Тимофеев, Дьокуускай куорат 3 №-дээх спортивнай оскуолатын биир бастыҥ үлэлээх тренерэ Иван Иванович Соркомов туттардылар.

Наҕараадалаһын быыһыгар ырыанан эҕэрдэлэр тиэрдилиннилэр. Холобур, СР норуодунай артыыһа, биллиилээх ырыаһыт Владимир Татаринов бу оскуола ыытар тэрээһиннэригэр, уопсайынан бэтэрээн спортсменнар үлэлэригэр өрүү күүс-көмө, өйөбүл буоларын санатар тоҕоостоох.

Тустуу күнүн биир бэлиэ түгэнинэн ССРС үс, Европа икки төгүллээх чемпиона, Үтүө Дьулуур оонньууларын кыайыылааҕа, аан дойду чемпионатын боруонса призера, спорт үтүөлээх маастара Василий Николаевич Гоголев эдэр тустууктарга анаан аһаҕас уруок ыыппыта буолар. Аттыбар турбут биир киһи сөхпүтүнүү, Баһылай бэйэтин сааһыгар холооно суох сылбырҕатык, чэпчэкитик туттан-хаптан, албастары көрдөрбүтүн киһи астынар. Кырдьык даҕаны, киһи  ити албастары хас эмэ тыһыынчата хатылаан, чочуйан оҥордоҕуна, этэргэ дылы, түүн түөрт чааска да туран, эҥкилэ суох оҥоруо…

Тустуу күнэ – көҥүл тустууга ССРС спордун маастара, Саха АССР үтүөлээх тренерэ, норуот ырыаһыта, тойуксута Николай Иванович Сафонов – Дьырылы таһаарыытыгар оһуохайынан түмүктэннэ.

Дьэ, ити курдук, В.П. Керемясов аатынан Дьокуускай куорат 3 №-дээх спортивнай оскуолатыгар бэрт сэргэх тэрээһин буолан ааста. Оскуола дириэктэрэ эппитинии, маннык тэрээһин – Тустуу күнэ сыллата үрдүк таһымнаахтык ыытылла турарыгар баҕарабыт.

Петр ПАВЛОВ.

Ааптар хаартыскаҕа түһэриитэ.  

Добавить комментарий

Ваш адрес email не будет опубликован. Обязательные поля помечены *