Василий Егоров Финляндияҕа буолбут турнирга кыайда

Кулун тутар 6-8 күннэригэр Финляндия киин куоратыгар – Хельсинкигэ боксаҕа норуоттар икки ардыларынааҕы турнир 39-с төгүлүн ыытыллан түмүктэннэ. Бу турнирга Россия сүүмэрдэммит хамаандатыгар киирэн биһиги биир дойдулаахпыт, спорт үтүөлээх маастара Василий Егоров кыттыыны ылла. Биллэрин курдук, кини былырыыҥҥыттан 52 киилэҕэ кыттар.

 

 

Хельсинкигэ, Василий кыттыбыт ыйааһыныгар аҕыс боксер баара. Бастаан, финал чиэппэригэр биһиги боксербут Сейран Егикяны (Армения) 5:0 ахсаанынан кыайда. Бу ыйааһыҥҥа атын киирсиилэргэ Тео Тико (Франция) – Шабир Хоссайнины (Афганистан), Павел Коваленко (Украина) – Сирхат Хассанины (Финляндия), Жамиянбат Цэрэнбат (Монголия) – Салах Ибрагимы (Германия) кыайдылар.

Оттон финалга кыттар иһин киирсиигэ Василий Егоров – француз Тиконы (4:1), украинец Коваленко – монгол Цэрэнбаты хоттулар.

Бастакы миэстэни ким ыларын быһаарсыыга Василий украинец Коваленконы 5:0 хотон, турнир кыайыылааҕынан буолла. Россияннартан өссө Алексей Мазур (63 кг) бастаата. Сергей Собылинскай (69 кг) уонна Шарапутдин Атаев (81 кг) иккис буоллулар.

Бу кыайыытынан Василий Егоров билигин даҕаны Россия олимпийскай хамаандатыгар кандидатынан сылдьарын бигэргэттэ. Санатан эттэххэ, былырыын Самараҕа буолан ааспыт Россия чемпионатын финалыгар кинини кыайбыт дагестнанец Расул Салиев сотору кэминэн Лондоҥҥа буолуохтаах Европа континенын Олимпиадаҕа сүүмэрдиир күрэхтэһиитигэр кыттыахтаах. Онно кини аҕыс күүстээхтэр ахсааннарыгар кыайан киирбэт түгэнигэр, сэрэйдэххэ, ыам ыйыгар Парижка былааннанар аан дойдутааҕы сүүмэрдээһиҥҥэ биһиги Василий Егоровпытын кытыннарыахтарын сөп. Онон эрэлбитин сүтэрбэппит.

Петр ПАВЛОВ. 

 

Добавить комментарий

Ваш адрес email не будет опубликован. Обязательные поля помечены *