Василий Егоров рингэҕэ субуотаҕа тахсыаҕа

 

Екатеринбург куоракка боксаҕа аан дойду чемпионата ыытылла турар. Эрдэ иһитиннэрбиппит курдук, Россия хамаандатын састаабыгар 52 киилэҕэ биһиги биир дойдулаахпыт, Россия уонна Европа иккилии төгүллээх чемпиона, аан дойду чемпионатын үрүҥ көмүс призера, спорт үтүөлээх маастара Василий Егоров кыттар.

 

 

Бырагыраама быһыытынан 52 кг ыйааһыннаахтар күрэхтэһиини балаҕан ыйын 12 күнүттэн саҕалыыллар. Бу күннэргэ ким кими кытта киирсэрин быһаарар сэрэбиэй буолла. Ол быһыытынан, 52 киилэҕэ барыта 41 боксер күөн көрсөр.

Биһиги Василийбыт бастакы эргииргэ сынньанар. Онтон балаҕан ыйын 14 күнүгэр – Луис Дельгадо (Эквадор) уонна Кашивасаки Тошо (Япония) пааратын кыайыылааҕын кытта көрсүөҕэ. Ити кудук, биһиги боксербут бөлөҕөр олимпийскай чемпион узбек Шахободин Зоиров, аан дойду чемпиона кубинец Йосвани Вейтия, аан дойду Кубогын кыайыылааҕа француз Билял Беннама, Европа оонньууларын боруонса призера англичанин Галал Яфай курдук күүстээхтэр бааллар.

Сабаҕалаан көрдөххө, Василий Егоров бастакы утарсааччытын аастаҕына, салгыы киирсиигэ Беннаманы кытта көрсүөн сөп. Онно кыайдаҕына, сэрэйдэххэ кини утарсааччытынан кубинец буолара буолуо. Уопсайынан, уолбут күүстээх бөлөххө түбэспит. Ол да буоллар, ким бу күҥҥэ, бу чааска үчүгэй бэлэмнээх, кыайыыга дьулуурдаах, бэйэтин бары өттүнэн үчүгэйдик сананар – ол кыайыылаах буолуоҕа. Спорт сокуона оннук. Уолбутугар ситиһиини  баҕарабыт.

Боксаҕа аан дойду чемпионатыттан быһа биэриини тэлэбиисэргэ “Матч!Боец” ханаалга көрүөххүтүн сөп.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *