Эбээн бытантайдар литературнай киэһэҕэ түмүстүлэр

Бэҕэһээ Ийэ тыл уонна сурук-бичик күнүгэр Эбээн Бытантай улууһун “Гарпан” этнокултуурунай киинигэр сэргэх литературнай киэһэ буолан ааста.


Тэрээһини Эбээн-Бытантай кииннэммит бибилэтиэкэтин ситимин үлэһиттэрэ иилээн-саҕалаан ыыттылар. Оскуола оҕолоро, “Үпэндьэл” ансаамбыл кыттыылаахтара хоһооннортон быһа тардыылары дорҕоонноохтук аахтылар.

Биир сэргэх түгэнинэн “Поэт года России -2016” үрдүк аат хаһаайына, хоһоонньут Михаил Колесовтыын истиҥ көрсүһүү буолар. Михаил Петрович хоһооннорун ааҕан иһитиннэрдэ, олоҕун суолун туһунан кылгастык сырдатта. “Эдэр сааска үктэнэр кэмнэрбэр хоһоон айан саҕалаабытым. Бастаан таптал, сыһыан туһунан хоһооннор тахсаллара, онтон утаа олох суолтатын, айылҕа кэрэтин, дойду умсулҕанын, философскай өйдөбүллээх хоһооннору айар буолбутум. Сахалыы да нуучча тылынан да тэҥинэн айабын. Хоһоону ыллыҥ да суруйбатыҥ биллэр, иэйии киириититтэн быһаччы тутулуктаах. Иэйии ордук айылҕаҕа сырыттахха уһуктар. Ардыгар араас түгэннэр кэмнэригэр, ол эбэтэр улахан үөрүүгэ биитэр хомолто куруһугар эмиэ иэйии биир дьикти көрүҥэ киирэр. Оҕолорго туһаайан этэбин, үөрэхтээх, билиилээх – көрүүлээх дьон буоларга дьулуһуҥ, үөрэхтээх киһи ыыра киэҥ, суола аһаҕас буолар. Айыҥ – тутуҥ, тула өттүнэн сайдыылаах дьон буолуҥ!“, – диэн Михаил Петрович эттэ.


Култуура уонна ускуустуба колледжын устудьуона, биир айдарыылаах, чаҕылхай ыччаппыт, дойдутугар судаарыстыбаннай практикатын ааһа сылдьар Айтал Слепцов Былатыан Ойуунускай айымньытыттан быһа тардыыны ааҕан иһитиннэрдэ.

“Бытантай уоттара” хаһыат.

Сообщение Эбээн бытантайдар литературнай киэһэҕэ түмүстүлэр появились сначала на Ulus.Media — все главные новости из районов Якутии.

Комментарии закрыты.