Эбээн-Бытантайтан төрүттээх Елена Колесова ситиһии өрөгөйүн, үөрүү үтүмэнин биллэ

Эбээн-Бытантайтай төрүттээх Елена Колесова дойдубут тэбэр сүрэҕэр Москуба куоракка ыытыллыбыт «Сокровища Севера. Мастера и художники России 2019» норуоттар икки ардыларынааҕы быыстапка дьаарбаҥкаҕа үрдүк ситиһиилэннэ.
Уопсастыбаннай олох көхтөөх кыттыылааҕа, аҕыйах ахсааннаах хотугу норуоттар бэрэстэбиитэллэрэ Елена Романовна «Полярный стиль» куонкуруска «За сохранение аутентичности», «Лучшее произведение национального народного искусства» куонкуруска «Национальный костюм (рыбья кожа») номинацияҕа «За возрождение традиций» диплому уонна кубогы ылан үөрүүтэ муҥура суох.
«Москубаҕа «Сокровища  Севера» 14-с норуоттар икки ардыларынааҕы быыстапкаҕа үтүмэн элбэх эрэгийиэн, ону кытта араас талааннаах дьон бары биир сиргэ муһуннулар. Холобур, Сахалинтан 50 кыттааччы кэлбитэ, бары араас хайысхаҕа оҥоһуктарын аҕалан көмүскээбиттэрэ. Онно олорон маастардар оҥоһуктарын оҥорон үөрэтэллэр, көрдөрөллөр, ырыаһыттар бэйэлэрин тылларынан ыллаан улахан далааһыннаах күрэх буолла. Норуот талба талаана манна мустар эбит диэн олус сөхтүм-махтайдым. Арай истэбин, биир дойдулаахпыт Михаил Уманов ырыата ыраахтан дьиэрэйэр. Тиийэн көрбүтүм, Хабаровскай эбээннэрэ кини ырыатыгар үнкүү туруоран үнкүүлээн битийдилэр уонна бириис ыллылар. Аны  бу быыстапкаҕа Санкт-Петербург куорат Герцен аатынан университет эбээн тылын преподавателын көрүстүм. Лера Федоренко-Колесова диэн, мин эһээм Георгий Васильевич Колесов бииргэ төрөөбүт быраатын Сэмэн сиэнэ кыыһа. Уруубун булан үөрүүм өссө үксээтэ. Үлэлээбитэ ырааппыт, учуонай, тыл үөрэхтээҕэ,» — диэн Елена Романовна санаатын үллэстэр.

Елена Романовна быыстапкаҕа барарыгар улахан көмөнү «Аборигенка» дьахталлар Ассоциацияларын түмсүүтэ (салайааччы Герес Ия Кимовна) бэйэтин бөлөҕөр бэһис киһинэн киллэрэн көмөлөспүт, өйөөбүтүгэр махтала муҥура суох. «Эбээн норуотун таҥаһын тигэн, ону кэпсээн үлэбин көмүскээтим. Бу тэрээһиҥҥэ кытта барарбар үп-харчы өттүнэн барытын бэйэм уйуннум уонна сүүрэн-көтөн атын бөлөххө киирдим. “Өмөн төрдүк” биир дойдулаахтарбыт түмсүүлэрэ (бэрэссэдээтэл Стручкова Аурика Дмитриевна), балтым Рената Шадрина-Колесова үбү-харчыны иэс биэрэн көмөлөстүлэр. Кинилэр миэхэ эрэллэрин ууран, тэрийсэн ыытаннар, салайааччым Ия Кимовна Герес өйөөн бу курдук үтүө санаалаах дьон баар буолан ситиһии өрөгөйө, үөрүү үтүмэнэ буолан Сахам сиригэр кэллим. Аны да инникитин улууһум, түөлбэм аатын ааттатан, киэн туттан кэпсээн элбэх конкурустарга, быыстапкаларга кыттыам», — диир биир дойдулаахпыт Елена Романовна.

Сардаана Копырина

Хаартыскаҕа: Саха сирин павильоннара, «Аборигенка» дьахталлар түмсүүлэрэ, Елена Колесова уруутунаан, эбээн тылын преподавателин Лера Федоренко-Колесованы кытта.

Добавить комментарий

Ваш адрес email не будет опубликован. Обязательные поля помечены *