ЭДЭР СУРУЙААЧЧЫЛАР СҮБЭ МУННЬАХТАРА КЭТЭХТЭН ЫЫТЫЛЛЫА

Үгэскэ кубулуйбут Эдэр суруйааччылар XXII өрөспүүбүлүкэтээҕи сүбэ мунньахтара, быйыл аан дойдуга улахан дьаҥ турбутунан, 2020 сыл алтынньы 6-8 күннэригэр кэтэхтэн видеоконференция ньыматынан ыытыллар буолла.

Бу айар ыччаты түмэр түһүлгэҕэ сүүмэрдээһин өссө кулун тутар ыйга ыытыллыбыта. Хос сүүмэрдээһин бу сыл балаҕан ыйын 25 күнүгэр диэри ыытыллар. Онон кэккэ биричиинэлэринэн сайаапка ыыппатах эбэтэр биллэриини саҥа көрбүт буоллаххына, кыттар кыах баар.

Саха сирин биллиилээх суруйааччылара, кириитиктэрэ салайар сахалыы тыллаах Поэзия, Проза, Дыраама, Кириитикэ, Оҕо литературатын, Нууччалыы тыллаах литература, Хотугу төрүт олохтоох аҕыйах ахсааннаах норуоттар литератураларын секциялара үлэлиэхтэрэ. Сүбэ мунньахха 18-тан 40 диэри саастаах Саха Өрөспүүбүлүкэтин бары олохтоохторо кыттар кыахтаахтар. Дыраама, Кириитикэ, Оҕо литературатын, Хотугу төрүт олохтоох аҕыйах ахсааннаах норуоттар литератураларын секцияларыгар кыттааччыга сааһа хааччахтаммат.

Сүбэ мунньах секцияларыгар кыттыы ирдэбилэ: поэзияҕа – 5-10 талыллыбыт хоһоон; прозаҕа – 1-3 талыллыбыт кэпсээн (эбэтэр биир улахан кээмэйдээх айымньы); дыраамаҕа – 1 актаах айымньы; нууччалыы тыллаах литератураҕа уонна хотугу аҕыйах ахсааннаах төрүт омуктар литератураларыгар – 5-10 хоһоон эбэтэр 1-3 диэри кэпсээн; оҕо литературатыгар – 5-10 хоһоон эбэтэр 1-3 диэри кэпсээн, остуоруйа; кириитикэҕэ – 1-3 критическэй ыстатыйа, рецензия. Ону тэҥэ кыттааччы кылгас биографиятын (манна киирэр: кыттааччы толору аата, сааһа, ханна олороро, киминэн үлэлиирэ, билсэр төлөпүөн, кылгас биографията) ыытара булгуччулаах.

Саас сайаапка ыыппыттар хат ыыппаттар. Хас биирдии кыттааччы икки секцияттан ордукка кыттара бобуллар. Саас элбэх секцияҕа ыыппыт кыттааччыны тэрийээччилэр бэйэлэрэ көрөн секциятын аныахтарын сөп. Поэзия уонна проза хайысхаларыгар кыттыы икки түһүмэхтээх. Сүүмэрдээһини ааспыттарга тэрийээччилэр балаҕан 30 күнүгэр диэри сибээскэ тахсыахтара. Хас биирдии кэтэхтэн кыттыылаахха туоһу сурук көрүллэр.

Сүбэ мунньахха сыһыаннаах боппуруостардаах буоллаххытына ederlit@mail.ru электроннай аадырыска суруйуоххутун эбэтэр үлэ кэмигэр +7(4112)32-50-72 нүөмэргэ эрийэн ыйыталаһыаххытын сөп.

Эдэр суруйааччылар XXII өрөспүүбүлүкэтээҕи сүбэ мунньахтара Саха сирин Суруйааччыларын сойууһун көҕүлээһининэн, СӨ Култуураҕа уонна духуобунай сайдыыга министиэристибэтин, СӨ Ыччат дьыалаларыгар уонна социальнай коммуникацияларга министиэристибэтин, «Саха сирин суруйааччыта» ассоциация, Саха Өрөспүүбүлүкэтин Национальнай библиотекатын өйөбүллэринэн ыытыллар.

 

Саха сирин Суруйааччыларын сойууһун пресс-киинэ

Добавить комментарий

Ваш адрес email не будет опубликован. Обязательные поля помечены *