Эйигинэн бары киэн туттабыт!

Бүгүн, ыам ыйын 11 күнүгэр хайыһарга Саха АССР спордун маастара, Бүлүү улууһун бочуоттаах гражданина, ССРС физическэй культураҕа уонна спорка туйгуна, Саха АССР физическэй культураҕа үтүөлээх үлэһитэ, 1962 сылтан физическэй культура уонна спорт эйгэтигэр үлэлиир, республикатааҕы Адаптивнай спорт киинин методист-инструктора Маргарита Григорьевна Куличкина лоп курдук 80 сааһын туолла.

 

Саха Республикатын Физическэй культураҕа уонна спорка үтүөлээх үлэһитин, Учууталлар учууталларын, Бүлүү улууһун уонна  Бүлүү куоратын Бочуоттаах олохтооҕун,  убаастабыллаах Маргарита Григорьевна Куличкинаҕа 80 сааһын туолбутунан, өрөгөйдөөх үбүлүөйүнэн – Бүлүү улууһун физическэй культураҕа уонна спорка кэмитиэтин, улуус спортивнай общественноһын уонна тус бэйэм ааппыттан итиитик истиҥник эҕэрдэбитин уонна Бүлүү улууһугар физическэй культура, спорт сайдыытыгар сүдү кылаатыҥ иһин барҕа махталбытын тиэрдэбит!

Бүлүү улууһун спорка күн бүгүҥҥэ диэри хас биирдии ситиһиилэрэ убаастабыллаах Маргарита Григорьевнаны кытта ыкса быстыбат ситимнээхтэр. Кини үтүөтэ, үлэтэ онно арылхайдык көстөр. Нэһилиэнньэ ортотугар спорт маассабайдык сайдыытыгар улахан тэрээһиннэри, үлэни ыыппыта күн бүгүҥҥэ диэри дьон махталын ылыан ылар. Ол курдук, “Доруобуйа” кулууп тэрийэн, онтон салҕананнар, Бүлүү улууһугар билигин элбэх, араас нэһилиэнньэ бары араҥатыгар доруобуйа кулууптара, общественнай спортивнай федерациялар, спортивнай кулууптар тэриллэн үлэлииллэр. Бүлүү улууһун спортивнай материальнай чааһа, спортивнай объектар тутуллууларыгар улаханнык сүүрбүтэ-көппүтэ таах хаалбатаҕа. Холобур, Бүлүү куоратын Бэстээҕи спортивнай саалата, “Уолбут” спортивнай стадион, хайыһар базата, 2009 сыллаахха Манчаары оонньууларыгар сүүрэр манежтаах «Оленск» стадион уонна 2017 сыллаахха Баһылай Гаврильевич Румянцев аатынан «Эрчим» спортивнай комплекс тутуллубута. Ити  кэлиҥҥи сылларга тутуллубут саҥа спортивнай объектар тутуллуулара олус ыарахан боппуруостардаах этэ. Үп-харчы да көрүллэригэр, федеральнай уонна республиканскай программаҕа киириигэ. Ону быһаарарга Маргарита Григорьевна аптарытыата, аата да сүдү оруоллаах уонна көмөлөөх буолбутун билэбин.

Маргарита Григорьевна спорт араас эйгэтигэр, хайысхатыгар элбэх специалистары иитиигэ сүдү оруоллаах. Билигин республика араас улуустарыгар уонна Дьокуускай куоракка кини үөрэппит, такайбыт оҕолоро, ыччаттара спорт эйгэтигэр уонна да атын үлэлэргэ ситиһиилээхтик үлэлии-хамсыы сылдьаллар. Ол курдук, Бүлүү улууһа (оройуона) муниципальнай тэриллии аҕа баһылыга Сергей Николаевич Винокуров, Саха сирин Физическэй культураҕа уонна спорка министрэ Иннокентий Юрьевич Григорьев, Бүлүү оройуонун Сэбиэтин председателэ Гаврил Семнович Корякин, уо.д.а.

Маргарита Григорьевна Бүлүү улууһун спордун сайдыытыгар сүдү кылаатын иһин, “Бүлүү улууһугар физическэй культураҕа уонна спорка сайдыытыгар сүдү кылаатын иһин” диэн Бочуоттаах бэлиэнэн наҕараадаламмыта. Маргарита Григорьевна билигин Дьокуускай куоракка «Самородок» спортивнай комплекска ситиһиилээхтик, эрчимнээхтик үлэлии сылдьан, дойдутун – Бүлүүтүн кытта ыкса сибээһин быспакка, биһигини кытта тэҥҥэ үлэлэһэр, көмөтө баһаам.

Түгэнинэн туһанан ытыктыыр, дириҥник убаастыыр, сүгүрүйэр киһибитигэр Маргарита Григорьевна Куличкинаҕа дьолу, үтүө доруобуйаны, сир үрдүгэр баар бары үтүөнү, кэрэни баҕарабыт! Эйигинэн бүлүүлэр бары киэн туттабыт, эн бааргар үөрэбит. Эйигин кытта тэҥҥэ үлэлээбиппититтэн, эйигиттэн үөрэммиппититтэн дьоллооҕунан ааҕынабыт. Өссө төгүл барҕа Махтал, Уруй! Айхал!!! Чугас дьоҥҥор, аймахтаргар, оҕолоргор, сиэннэргэр, хос сиэннэргэр бары үтүөнү, кэрэни!

Гаврил ЕВСЕЕВ, СР Физическэй культураҕа уонна спорка туйгуна, Саха сиринээҕи «Урожай» спортивнай общество бочуоттаах үлэһитэ, Бүлүү улууһун физическэй культураҕа уонна спорка председателэ.

Добавить комментарий

Ваш адрес email не будет опубликован. Обязательные поля помечены *