«Ырыабар олус махтанабын»

Урут истээччилэригэр Егор Степанов диэн аатынан биллэр, билигин Кылаан Кындыл «Сүрэхпинэн» диэн айар киэһэтэ саха драматическай театрыгар буоларын туһунан биллэрии дьон-сэргэ интэриэһин тардыбыта.
Олунньу 22 күнүгэр буолбут икки кэнсиэргэ дьон-сэргэ тобус толору муһунна. Кылаан Кындыл сахалыы сайаҕас тыыннаах ырыа киэһэтин бэйэтэ истиҥ кэпсээнинэн ыпсаран салайан ыытта. Дьокуускайдааҕы 2 №-дээх педагогическай училище музыкальнай салаатын, онтон СГУ саха тылыгар уонна культурологияҕа салаатын бүтэрэн, идэтийбит култуура үлэһитэ буолан, ол идэтинэн 8 сыл култуура эйгэтигэр үлэлээбит.
Бүлүү улууһун Кыргыдайыгар улааппыт, оҕо эрдэҕиттэн гитараны кыбынан ырыа матыыптарын сыыйа тардан, сахалыы матыып умсулҕаныгар ылларбыт уолга ырыа улахан суолталаах. Кылаан Кындыл кини дьылҕатыгар ылбаҕай ырыа аргыс буолбутугар улаханнык махтанарын туһунан эттэ. Көрөөччүлэр кинини 2013 сыллаахха «Үрдэл» музыкальнай күрэскэ «Ньургуһуннар» диэн ырыанан ситиһиилээхтик кыттыбытын өйдөөн хаалбыттар. Кылаан Кындыл билигин репертура киэҥ, ол иһигэр уонча бэйэтэ айбыт ырыалаах. Кылаан ырыалара бэртээхэй клип буолан киэҥ эйгэҕэ тарҕаммыттарын көрөөччү сөбүлээн көрөр.
«Сүрэхпинэн» диэн иэйиилээхтик ааттаммыт айар киэһэтин Дьокуускайдааҕы культурнай-сырдатар училище «Күн Өркөн» кэлэктиибэ бэлэмнээн туруорда. Бу киэһэ Кылаан Кындыл уруккуттан толорор, көрөөччүгэ саҥа таһаарар ырыалара ылланнылар. Көрөөччү кылын таарыйар туспа, ураты тембрдээх толорооччу ырыаларын саала иһирэхтик ылынна. Ытыс күүстээх таһыныытынан биһирии, тэҥҥэ ыллаһа олордо.
– Сахам дьонугар ис сүрэхпиттэн махтанабын. «Сүрэхпинэн» айар кэнсиэрпэр, икки сааланы тобус толору кэлэҥҥит, алгыскытын уҕараабат ытыскыт тыаһынан бэлэх уунаҥҥыт, истиҥ иэйиини кынаттаан көтүттүгүт. Үтүө санааҕыт хас эмэ төгүл алгыһынан эргилиннин, табыллыы, тупсуу аргыстаах, тахсыылаах, таһымнаах олоҕу баҕарабын,– диир Кылаан Кындыл.
Кылаан Кындыл айар киэһэтигэр Бүлүүттэн биир дойдулааҕа, тахсан эрэр талааннаах ырыаһыт Иоганн Матвеев, эдьиийэ, опера уонна балет театрын солистката Мария Михайлова, эдэркээн ырыаһыттар Айыллаана Степанова, Мичил Моисеев кытыннылар.
– Бу оҕолор «Кэрэл» киинэҕэ оҥоһуллубут клипкэ «Мин көрөбүн сүрэхпинэн» ырыаларын истэн баран наһаа да долгуйбутум. Хаһан эбит айар киэһэбин оҥорор күннээх буоллахпына кинилэри хайаан да ыҥырыам дии санаабытым. Ол баҕа санаам туолла,– диир Кылаан.
Кылаан хаан тардыһар, үөһэттэн араҥаччылыыр, харыстыыр дьонун ааттарынан сахалыы сүрэхтэнэн баран бу бастакы айар кэнсиэрэ. Аҕатынан хаан-уруу аймаҕа норуот бэйээтэ Иван Гоголев-Кындыл Уйбаан төрөөбүтэ 90 сылыгар түбэспитэ эмиэ кэрэ-бэлиэ түгэн.

Галина Нельбисова

Добавить комментарий

Ваш адрес email не будет опубликован. Обязательные поля помечены *