Ытык Күөлгэ «Амтаннаах ас» бастыҥын ааттаатылар

Соторутааҕыта Ытык Күөлгэ «Түмсүүлээх үлэ уйгулаах түһүлгэтэ» күһүҥҥү атыы-тутуу дьаарбаҥкатыгар «Амтаннаах ас» быыстапка куонкуруһа ыытылынна. «Таатта минньигэс барыанньата», «Бастыҥ сыр», «Ноу-Хау» көрүҥнэргэ кыайыылаахтары быһаардылар.


«Күһүҥҥү киһи күлбүтүнэн» диэн мээнэҕэ эппэттэр. Ытык Күөл күһүҥҥү атыытын-тутуутун дьаарбаҥкатыгар сатабыллаах хаһаайкалар оҕуруот уонна сир аһын быйаҥыттан дэлэгэй барыанньаны аҕалан көрдөрүүгэ туруоран, баҕалаахтарга амсатан, интэриэһиргээччилэргэ ырысыаптарын биэрэн, ордуктарын атыылаатылар. Этэргэ дылы икки өттүттэн барыстаах, туһалаах атыы-кутуу таҕыста.

Ытык Күөл «Аартык» түөлбэттэн Любовь Турнина уонна Яна Тимофеева буолан кытыннылар. Любовь 6 көрүҥ хомпуоту, 10-ча салат, мохито көрүҥүн, хортуоппуйтан бэрэски аҕалбыт. Хортуоппуй пюретыттан тиэстэ оҥорон, булочка астаан аҕалбытын, дьон-сэргэ тута амсайан сиэн бүтэрбиттэр. Онтон Яна Харитонова баклажаны сөбүлээн олордобун диир. Быыстапкаҕа баклажантан 5 ас көрүҥүн оҥорон аҕалбыт. Баклажантан моркуоптаах рулет, эт фаршыттан рулет, панировкаҕа сууламмыт баклажан, маны тэҥэ сыыр үс көрүҥэ баар.

«Сайдам» түөлбэттэн Зинаида Николаева 23 көрүҥ барыанньаны буһаран, эбиитин биир тэҥ кырасыабай иһиттэргэ кутан, көрөөччүлэр болҕомтолорун ылыан ылла. Манна күндү, маанылаах дыргыл сыттаах дьэдьэнтэн саҕалаан сир аһын бары көрүҥнэриттэн, клубника, малина, абрикос уонна араас соҕуруу дойду фрукталарынан барыанньа оҥорбута, көрбүт эрэ киһи хараҕын халтарытта.

Харбалаахтан Акулина Ивановна Корякина 8 көрүҥ сыыр оҥорон аҕалбыт. Хаһаайка: «Сыыр сүрүннээн оҥоһуллар ырысыаба биир. Мантан бэйэм икки көрүҥү боруобалаан, эбии ону-маны кутан оҥордум. Холобур, бу икки лиитэрэлээх 2,5%-наах үүккэ, биир чаайынай ньуоска лимоннай кислотаны булкуйан оҥордум. Үүккэ оргуйуон аҕай иннинэ сыыйа лимоннай кислотаны кутабыт. 2-3 мүн. булкуйабыт. Манна густоктар тахсаллар. Сиидэлиибит, тэһэҕэстээх иһиккэ угабыт, баттатабыт 40-50 мүн. турар. Мантан 250 гр сыыр кэлэр», — диэн кэпсиир. 12 чаас холодильникка туруорар эбит. Аны «Иэдьэгэйтэн кытаанах сыыр» рецебын туһунан: «Үүккэ творогы кутан оргутабыт уонна булкуйа турабыт. Сыворотката араҕыста да, сиидэлиибит, сыстаҥнас, субуллаҕас сыыры орто уокка көстүрүүлэҕэ уурабыт. Икки сымыыкка биир чаайынай ньуоска туус, онно эбии биир чаайынай ньуоска суода кутан, 10 мүнүүтэ буккуйабыт. Күүгэннирэн үллэр, күүгэнэ уостубутун кэннэ ылан формаҕа угабыт. Холодильникка сойуор диэри туруорабыт. Бэйэм сүөһүлээх буоламмын сыыры сөбүлээн оҥоробун», — диэн этэр.

«Айылҕаана» түмсүүгэ уопсайа 23 киһи сылдьар. Дьаарбаҥкаҕа айылҕааналар сир аһыттан, олордубут үүнээйилэриттэн 35 көрүҥ аһы-үөлү астаан аҕалбыттар. Бу түмсүү биир актыыбынай кыттыылааҕа, улууска биллэр оҕуруотчут Л.П.Луковцева оҕуруотугар үүнэр отонноох мастарыттан, тыкватыттан джем, топинамбур сибэкки хортуоскатыттан салат, барыанньа, яблонятыттан хомпуот оҥорон аҕалан, түмсүү аһын-үөлүн бэркэ сэргэхситтэ.

Дьаарбаҥкаҕа чычымахтар ох курдук оҥостон кэлбиттэр. Ол курдук олохтоох оскуола агрохайысхалаах. Быйыл сайын оҕуруот аһын дэлэччи олордон, кыһын кыстыыр оҕуруоттарын аһынан хааччынан олороллор. Бу агрохайысхаҕа А.В.Никифорова, Л.В.Табунанова, М.В.Малышева, бу күһүҥҥүттэн С.И.Попова үлэлииллэр эбит. Олохтоох оскуола биология учуутала Дария Егоровна Иванова уруок таһынааҕы Foot-флористика көрүҥүнэн дьарыктаан эрэр. Оҕолор саҥа көрүҥ эбии үөрэхтээһинигэр сөбүлээн сылдьаллар. Дьаарбаҥкаҕа «Оҕуруот аһыттан ноу-хау» хайысхатыгар кыттаары киирбиттэр. Дария Егоровна оҥоһуктары көрдөрө-көрдөрө: «Бу оскуолабытыттан А.П.Миронова сиэнинээн Юлиялыын кабачоктан оҥорбут чайнай сервиһэ, Никифоровтар дьиэ кэргэн оҥорбут оҕуруот астан паннолара турар, алын сүһүөх оскуола оҕолоро айылҕа матырыйаалыттан оҥорбут оҥоһуктарын уонна бу утахтары, эмтээх оттору, дьиэ сибэккилэрин, сэппэрээктэри көрдөрүүгэ туруордубут. Оҕуруот аһыттан фотозона тэрийдибит. Оҕолор саҥа көрүҥү сөбүлээн, үөрэ-көтө ону-маны оҥороллор», — диэн кэпсиир. Чычымахтар күһүҥҥү өлгөм үүнүүлээх оҕуруот аһыттан аныгы кэм ирдэбилинэн араастаан суулаан, букет оҥорон, аҥаардас оҕуруот аһыттан панно да дьиҥнээх ноу-хау буолла. Холобур, оҕуруот аһыттан паннону уонна букеты ыллыҥ да сибиэһэй салат оҥорон кэбиһэҕин. «Бу паннону куонкуруска аҕаллыбыт», — диир Д.Е.Иванова. Онон дьаарбаҥкаҕа оҕуруот аһыттан судургу эрээри дьикти аһы-үөлү астаан, саҥа сүүрээни киллэрбиттэрэ сонун буолла.

«Амтаннаах ас» куонкурус түмүгүнэн «Таатта минньигэс барыанньата» көрүҥҥэ бастакы миэстэни Зинаида Ильинична Николаева, иккиһи Уус Тааттаттан Айталина Николаевна Иванова, үсүһү Чымынаайыттан Ирина Никитична Варламова, «Бастыҥ сыр» аска Харбалаахтан Акулина Ивановна Корякина, иккиһи Ытык Күөлтэн Яна Тимофеевна Харитонова, үһүс миэстэни Чычымахтан Мария Пантелеймоновна Аввакумова ыллылар. «Ноу-Хау» көрүҥҥэ бастакы миэстэни Яна Тимофеевна Харитонова, иккиһи Любовь Николаевна Турнина, үһүс миэстэни Ытык Күөлтэн «Айылҕаана» эбээлэр түмсүүлэрэ ыллылар. Онтон Чычымах орто оскуолата анал сертификатынан бэлиэтэннэ.

Ааптар: С.ХАЛГАЕВА.

Сообщение Ытык Күөлгэ «Амтаннаах ас» бастыҥын ааттаатылар появились сначала на Ulus.Media — все главные новости из районов Якутии.

Комментарии закрыты.